Aanaarlâš Anna Askala kaavnâi taan keesi vuosmuid kuobbârijd jo syeinimáánu aalgâst päikkišiljostis Siggávuonâst.
Aanaarliih láá vuáttám et kuobbâreh iteh jyehi ive tolebiššáá ko ovdebáá ive.
– Ilolâš äšši herskutaatih lijjii mijjân, ko mij puurrâp hirmâd ennuv kuobbârijd já párnááh lijkkojeh taid nuurrâđ. Tiäđust-uv tom smiättá, et mii immâšijd luándust lii tääl monâmin, mutâ ij toos vaje maiden muide ko piergiđ, juurdâš Askala.
Meid avveellâš Eero Jääskeläinen lii päikkikuávlustis Kuáppilist uáinám maaŋgâid tattišlaajâid jo tääl syeinimáánust.
– Vaarâ kuobbâreh-uv láá puáttám tooleeb, tego luándust mudoi-uv puoh. Kiđđâ puátá tolebiššáá, rääsih liäđuh já myerjih šaddeh tolebiššáá, te manengis iä kuobbâreh meid? Tot ij lah šoddâm fakkist. Tot lii kuhes äigipaje nubástus, mii lii iheluuvij siste ovdánâm.
Kuobârpaje ij lah val olmânáál álgám
Laapi kuobârseervi saavâjođetteijee Seija Korpinen mield kuobârpaje ij lah val olmânáál álgám veikkâ ovtâskâs kuobbâreh liččii ittáám.
Arvepeeivih já liegâsvuotâ šoddâdeh pyere tile kesikuobbârijd šoddâđ, moh láá paakâi já koškesvuođâ keežild lamaš majemui iivij uccáá.
Šoŋŋâdâhtiettuulágádâs mield tavemuu Laapist kesimáánu lâi lieggâsub já arvab ko táválávt.
Korpinen mield ovtâskâs kuobbâreh pyehtih šoddâđ tooláá, jis lahtâvuotâ já liegâsvuotâ láá mudágááh.
– Tot ij kuittâg táárgut tom, et kuobârpaje liččii álgám.
