Heahtá Muotkkejávrris ássi Marielle Näkkäläjärvi ii oidno sáttogáttis velohallamin ja joavdelastimin. Son baicce murre, bargá suoidnebargguid ja lea miessemearkumiin.
Miessemearkumat leat geasi deháleamos ášši muhto gal son earásge návddaša Sámi geasis.
– Buoremus áigi lea ovdal čuikema ja go lea áigi duoddaris guolástit, govvida Näkkäläjärvi.
22-jahkásaš Näkkäläjärvi eallá bottus, ii ovddalgihtii dahkkojuvvon plánaid mielde. Son dahká maid geargá, ja maid de fuomáša.
– Munnje gal ii heive plánen ii vehášge. Jus mun juoidá plánen dat ii sihkkaritge lihkosmuva. Jus eallá dan bottus mii lea, dasto gal manná bures.
”Ferte mannat geahččalit earáge sajiid, ahte makkár dat orru”
Čakčat rievdá máŋgga nuora eallin, go ferte vuolgit studeret. Nu maiddái Näkkäläjärvisge.
– Dan čavčča mun in nu mielain vuordde. Gal dat livčče dáppe somá leahkit. Dieđusge jus ferte studeret, dalle ferte fárret. Iihan dán paradiijás gal hálidivčče oktage vuolgit.
Snihkkára dutkkus sus lea jo muhto dál áigu eará dutkosa vuolgit viežžat. Son lea ohcan sierra studerenbáikkiid Oulus ja Roavenjárggas.
– Galhan nuorran dieđusge ferte studeret ja mannat geahččalit earáge sajiid, ahte makkár dat orru, joatká Näkkäläjärvi.
Studeremiid maŋŋá Näkkäläjärvi áigu máhccat ruoktot, Heahttái.
– Dieđusge háliidivččen oaidnit, ahte livččen dáppe orrumin, ja dáppe manná bures ja lea bargu. Dáppe lea buot maid olmmoš dárbbaša.
Näkkäläjärvi oaidná, ahte Eanodaga guovllus lea buorre boahtteáigi, iige gielda ja guovlu leat eisige goarráneamen.
– Olles áigge fárrejit eanet olbmot, gielda orru stuorrumin ja bohtet ođđa fitnodagat.
