Aanar kåʹdd lij pueʹreʹmmen Čeʹvetjääuʹr siid takaikääʹv: siʹjdde raajât ođđ, nuʹtt õõut ǩilomettar kuʹǩes väʹʒʒempälggaz da Čeʹvetjääuʹr vuõjdõõttâmreeddast šâdd veerǥlaž vuõjdõõttâmredd.
Aanarkååʹdd teeknlaž luʹvddkåʹdd priimi ǩieʹssmannu såbbreʹstes taʹrjjõõzz mäddraajjâmtuâjain Čeʹvetjääuʹr ođđ väʹʒʒempälggsa. Raajjâmtuâjain tuejjeet väʹʒʒempälggaz, kååʹtt pohtt staanvuõđ jeäʹrben päärnaid da vuõrâsoummid.
Kåʹddvälddõsneǩ Anni Koivisto eʹtǩǩii Čeʹvetjääuʹr staanvuõđ oouʹdummuž Aanar kåʹddvälddõʹsse, välddõsneǩ Arto Leivo tuärjjeʹmmen. Leivo lij ouddlõž čeʹvetjäuʹrrneǩ da moštt puârast, mõõn staantem siid čuâǥǥas lij leämmaž pääiklaid.
– Čuõkku kuâŋŋsest lij vaiggâd jååʹtted vääʹʒʒeeʹl, ko toʹben lij samai jiânnai loʹsses jååttlõk. Kâʹl tõt lij vaaʹʒʒjid staanʼjab jååʹtted pååđpälggaz mieʹldd, jõs ouddmiârkkân ommǥa ǩiččlâdd vuäđđted vaaunin, mušttal Leivo.
Väʹʒʒempälggaz huâlat pirr eeʹjj. Pälggsest šâdd šiõǥǥ jeäʹrben škooulniiʹǩǩid, kook jåʹtte jiânnai škooul da liikkeemǩeeʹdd kõõsk.
– Ååʹn uʹčteeʹl vuäiʹtte lueʹštted päärnaid väʹʒʒed õhttu tõn kõõsk, rämmaš Leivo.
Ođđ kääʹvv pohtt oudldõõzzid kääzzkõõzzid
Aanar kååʹdd teeknlaž jååʹđteei Reetta-Maria Tammela mieʹldd Čeʹvetjäuʹrr lij valddum mieʹldd prograʹmme, kååʹtt oouʹdad väʒʒmõõžž da tanccâmkååʹlzin jååttmõõžž siidin.
Teeknlaž jååʹđteei mieʹldd ođđ kaaʹvin raajât pueʹttiääiʹj še čårrsiʹjdde.
– Čeʹvetjäuʹrr lij sâjjõõzzâs diõtt tääʹrǩes Aanar vueʹss: siid škooul seillmõš ooudald päärnaid da piârrjid, mõʹnt voudda leät plaaneʹmmen takaikääʹv. Šuurmõs vueʹss vuuʹdest lij Meäʹcchalltõõzz vaaldšem jânnam, da täin kaaʹvin čuäʹjtet oudldõõzzid kääzzkõõzzid da jälstummša, mušttal Tammela neʹttpååʹšt pääiʹǩ.
Kääʹv leät tuejjääm õhttsažtuâjast pääiklaž paalǥâskooʹddin da Saaʹmi siidsåbbrin. Kääʹvvhäämas puätt vueiʹnnemnalla čâhčča.
Nuʹtt še välddõsneǩ Arto Leivo tuäivv, što ođđ kaaʹvin Čeʹvetjääuʹr sijdd seill jieʹlli sijddân.
– Tuõiv lij, što tõt oouʹdeʹči siid jieʹllemviõkksažvuõđ, tok puäđče ođđ päʹrnnpiârri da ânnʼjõž päʹrnnpiârri maažžče toʹben, što oummin leʹčči vuäittmõš jieʹlled da tuejjeed tuâj toʹben, smeâtt Leivo.
