Lappi eallinfápmoguovddáš lea mieđihan dan geassái gávcci spiehkastatlobi luossabivdui Deanus.
Eallindápmoguovddáš oaččui 11 spiehkastatlohpeohcamuša báikkálaš organisašuvnnain ja doibmiin Deanu oahpahus- ja kulturvuođustuvvon bivdui.
Spiehkastatlobiin luossabivdovejolašvuođat leat ráddjejuvvon okta diddi bivdolobi ektui. Buot badjel 65 cm sturrosaš luosaid galgá luoitit ruovttoluotta nu, ahte dat bártašuvvet nu unnán go vejolaš. Maiddái jápmán luosaid galgá luoitit fas johkii.
Deanus lea ain heajos luossadilli
Lappi eallinfápmoguovddáša guolledoalloáššedovdi Jarmo Tuukkanen lohká, ahte spiehkastanlobiid mieđiheami vuođđun leat áigeguovdilis dieđalaš ja dutkojuvvon diehtu, luosa goargŋumiid statistihkkat sihke biologalaš rávvagat Deanu luossanáli dilis jagis 2025.
Deanu čázádaga luosaid čuovvunstatistihkas boahtá ovdan, ahte johkii gorgŋejeaddji luosaid mearri leat ain vuollegis dásis ja jagi 2026 áigge leat dán rádjai luosat gorgŋen hui unnán.
Háliidit sirdit árbevirolaš dieđu ja guolástankultuvrra nuoraide
Guolástannjuolggadusa spiehkastatlobiid ulbmilin ii leat dahkat vejolažžan luossabivddu viiddideami, muhto váldodeaddu galgá leat vugiid oahpisteamis, rávvemis ja oahpaheamis báikkálaš olbmuid gaskkas ja dáiddu sirdimis nuorat sohkabuolvvaide, deadduha Tuukkanen.
Guollebivdu galgá dáhpáhuvvat ovddalgihtii almmuhuvvon báikkis, ja guolástanbearráigehččui galgá dahkat almmuhusa guollebivddus ovddalgihtii, muitala Lappi eallinfápmoguovddáš dieđáhusastis.
Luossašálaš galgá almmuhuvvot sihke guolástanbearráigehččui ja Lappi eallinfápmoguovddážii. Dasa lassin bivdu galgá heaittihuvvot dálán, go ovtta luosa šálašdihtoearri lea dievvan.
Tuukkanen muitala, ahte golmma organisašuvnna ohcamušaide eiseváldi lea dahkan negatiivvalaš mearrádusa. Sivvan negatiivvalaš mearrádusaidde lei eanáš dat, go áššebáhpáriid eai doaimmahan áiggil.
