Lávvardaga njukčamánu 20. beaivve 2027 lágiduvvo stuorra musihkkadáhpáhus Sámi Grand Prix (SGP) fas Guovdageainnus.
Sámi musihkkafestivála, NRK, SVT ja Yle bovdejit sihke hárjánan artisttaid ja ođđa taleanttaid sáddet luđiid ja lávlagiid boahtte jagi gilvui. SGP sávvá beroštumi olles Sámis. Boađát dal unna gilážis, stuorra gávpogis dahje gos beare, ulbmil lea seamma: SGP čájeha dálá sámi musihka viidodaga, kvalitehta ja girjáivuođa.
Boahtte jagi sáhttá leat du luohti dahje lávlla mii čohkke davviriikkaid TV-šearpma ovdii.
Sádde jietnafiilla deike.
Nanne sámi musihkka
Lágideaddjiid mielas lea álo gelddolaš oaidnit, geat sáddejit sisa lávlaga dahje luođi. Juohke jagi bohtet ovdan ođđa jienat, muitalusat ja ovdanbuktimat. Muhto maiddái hárjánan juoigit ja artisttat háliidit searvat SGP-gilvui.
– Justa dat deaivvadeapmi ođđa taleanttaid ja hárjánan lávluid ja juigiid gaskkas dahká gilvvu nu dehálažžan sámi musihkkaeallimii, dadjá Sámi musihkkafestivála prošeaktajođiheaddji Jesse Hætta.
Dieđihanáigemeari dievvama maŋŋá árvvoštallet guldalanjoavkkut bihtáid. Fágajoavku, man Sámi musihkkafestivála ja sáttaásahusat leat čohkken, vállje daid geat besset viidáseappot gilvui. Artisttat almmuhuvvojit dálvvi áigge
Sámi Grand Prix-searvamis ii leat sáhka dušše gilvoeahkeda birra. Ovdal dan artisttat loktejuvvojit oidnosii TV-prográmmain, jearahallamiid ja media-oassálastimiid bokte sihke Norggas, Ruoŧas ja Suomas.
Dat buktá luođi ja musihka oidnosii dakkár vuogi mielde, maid eará lávddit sáhttet hárve fállat. Máŋgga artistii leamašan SGP álgun ođđa vejolašvuođaide, eanet konsearttaide ja stuorát beroštupmái.
Dehálaš sámi deaivvadanbáiki ja nana davviriikkalaš ovttasbargu
SGP lea dehálaš deaivvadanbáiki Sámis gos sámi ovdanbuktimat ja garra muitalusat ožžot ahtanuššat buolvvas bulvii. Das lea erenoamáš ja dehálaš servodatdoaibma, ja NRK lea rámis go beassá leat fárus loktemin dán ovdan davviriikkalaš TV-dáhpáhussan.
– SGP-sátta čájeha sámi girjáivuođa álbmogis, geat ásset máŋgga riikkas, geain lea ealli kultuvra ja máŋga iešguđet giela. Mii jáhkkit, ahte artisttaid muitalusat njeidet boares stereotypiijaid ja addet geahččiide duohta gova das maid mearkkaša leat sápmelaš dán áigge, dadjá NRK Sámi doaimmahushoavda Norleif Krokmo.
Sámi gielaid, luohtedábiid ja musihkkaovdanbuktimiid girjáivuohta lea gilvvu stuorámus fápmu. Ylei lea dehálaš beassat gullat olles Sámi musihkkaviidodaga.
– Lea mávssolaš oaidnit artisttaid miehtá Sámi čuožžumin lávddi alde ja lávlumin dahje juoigamen iežaset gillii. Danne mii sávvat ahte ollugat válljejit sáddet luđiid ja lávlagiid dán jagi maid, dadjá Yle Sámi vástideaddji doaimmaheaddji Linnea Rasmus.
SVT bargá lahkalaga NRK:in ja áigu maiddái dán vuoru ráhkadit TV-prográmma mii ovdanbuktá artisttaid ovdal finála.
– SGP bokte besset ođđa sámi taleanttat ja muitalusat leavvat miehtá Ruoŧa ja Davviriikkaid. Sámi musihkka lea vearditmeahttun oassi Ruoŧa musihkkaárbbis, ja ealli sámi musihkka riggodahttá min olles servvodaga, dadjá prošeaktajođiheaddji Moa Frygell.
Sisasáddenáigemearri lea čakčamánu 28. beaivve. Oktanaga sáhttá sáddet sisa maiddái máŋga luođi ja lávlaga. Luođi ja lávlaga sáhttá maid sáddet šleađgapoasttain Sámi musihkkafestiválii.
Dás sáhtát geahččat jagi 2026 Sámi Grand Prix -gilvvu.
