Olles Lappis turisttaid mearri lassánii juovla- ja njukčamánu gaskasaš áiggis gaskamearálaččat njeallje proseantta. Seammás Ohcejogas idjadeamit geahppánedje seamma áigodagas sullii 36 proseantta ovddit jagis, boahtá ovdan Business Finland -dieđuin.
Gáregasnjárgalaš Kalastajan Majatalo Oy joraha hotealla ja restoráŋŋa Guossi. Dan okta oamasteddjiin ja restoráŋŋahoavda Poasta-Ilmára Hánssa Stefan, Stefan Rasmus maid vásihii jaskadut dálvebaji.
– Gáregasnjárgii dádjadedje uhcit olbmot, go moadde ovddit dálvve. Ođđajagimánus ledje hirbmat buollašat, dat ráddjii, árvala Rasmus.
Kalastajan Majatalo lea Gáregasnjárgga guovddážis. Rasmus vásiha, ahte báiki lea dakkár, gos olbmot beare bisánastet.
– Munnos leamašan váttisvuohta vuovdit bálvalusaid olbmuide geat leat dušše ovtta ija.
Rasmus muitala, ahte sin luhtte bisánastet turisttat, geat leat plánen mátkki guhkás ja jotket mátkki. Son goit oaidná, ahte ovdamearkka dihte Norgga Davvinjárga buktá maiddái Kalastajan Majataloi idjadeddjiid.
Ohcejohka lea eallán guhká luossaturismmas. Go Deanus gilde luossabivddu, álge maid gielddas bidjat návccaid maid eará turismma ovddideapmái.
Dálveturisma leage Ohcejogas maŋimus golmma jagi áigge lassánan dássidit, earet vássán dálvve turisttaid idjadanmearit njidje.
Gielddas árvalit ahte máilmmi ráfehis dilli váikkuha maid Ohcejoga turismii. Gielddahoavda Päivi Kontio oaidná dasa máŋga siva.
– Máilmmi- ja ruhtadilli lea dakkár. Olbmot eai duostta várret ovddalgihtii ja vuolgit seammaláhkai mátkái. Nuortakránnjá doaimmat ja dilli Lahka-Nuorttis sihkkarit váikkuhit olbmuid millii mátkkoštit.
Statistihkaid mielde Ohcejogas turisttaid idjadanmearit leat geahppánan sihke registrerejuvvon idjadanbáikkiin nugo hoteallain, ja maiddái oanehisáiggeláigoheamis.
Ohcejogas áigot doarjut fitnodatdoalliid
Ohcejoga gielddas lea jagi álggus álgán ođđa riikkaidgaskasaš turismma ovddidanbálgá -prošeakta, mainna ovddidit turismma.
Prošeavtta ulbmilin lea oažžut ohcejohkalaš fitnodagaid ja sin bálvalusaid buorebut oidnosii. Prošeakta fállá earret eará doarjaga neahttasiidduid dahkamii ja sosiála media ávkkástallamii márkanastimis.
Prošeaktahoavda Tuomo Merentie muitala, ahte guovtti jagi siste fitnu ulbmilin lea maid ovddidit infrastruktuvrra ja ságastit das, mo Ohcejoga hearkkes duottarluonddu sáhttá geavahit mátkeealáhusas.
– Ohcejoga gielddas lea ulbmilin ságastallagoahtit ovttas fitnodatdoalliiguin, Meahciráđđehusain ja maiddái bálgosiiguin, ja gávdnat oktasaš čovdosiid vai hearkkes duottarluondu ii nu gola, muitala Merentie.
Prošeavttain áigot čoavdit maid dan, mo vuovdalit Ohcejoga bálvalusaid olgoriikka mátkeordnejeddjiide.
Gielddas lea jáhkku, ahte olgoriikalaš turisttat gávdnet Ohcejohkii. Ohcejohka lea rádjegielda ja sii háliiditge ordnet aktivitehtaid ovttas Norgga fitnodatdolliiguin.
Vaikko dát dálvi ii geasuhan Ohcejohkii turisttaid nu ollu go ovdal, gávdno boahttevuhtii goit jáhkku maiddái gáregasnjárgalaš fitnodatdoallis.
– Dal lea dieđusge boahtte jagis šaddamin vehá earálágan. Boahtte jahkái leat vuovdán jo ollu eambo njukčamánnui, maid dán dálvve lea leamašan. Boahtte jagis jáhkán šaddat ollu buoret, muitala Stefan Rasmus.
