Heaikka Káre, Kaarin Somby-Sorvari vádjolii gieskat. Son álggii 1960-logus doaimmahit ja lohkat sámegielat ođđasiid Lappi guovloradio Roavvenjárgga studios ja gearggai bargat Sámeradios badjel 20 jagi.
1970-logus sámedoaimmahus fárrii Anárii. Heaikka Káre álggii dalle fuolahit doaimmahusa beaivválaš áššiin degomat máksojohtolagas. Dan lassin son jođii báddemin rohkosprográmmaid ja veahkehii earáge sámegielat prográmmaid ráhkadeames.
Jagis 1985 Heaikka Káres šattai sámeradio hoavdda čálli, go Sámeradios šattai iehčanas radio. Hoavdan nammaduvvui dalle Jovnna Máret Jusse, Juhani Nousuniemi guhte lei jo dan rádjái guhká bargan Heaikka Káriin ovttas.
– Káre lei hui veahkkái. Bohten 1975:s vuosttas geardde geassedoaimmaheaddjin sámeradiodoaimmahussii Anárii. Káre lei dat áidna olmmoš, gii oahpahii munnje buot.
Heaikka Káre fertii maid muittuhit nuorra doaimmaheaddji báberáššiid dehálašvuođas. Jovnna Máret Jusse muitá, man váttis lei deavdit buot Yleisradio skoviid.
– Nummirkoodaiguin galggai mearkut ja munhan in muitán daid álo. Ja mun vehá ledjen dan mielas, ahte dát lea eanetge dego dihki njuovvan, áibbaš dušši bargu. Káre logai munnje, ahte dat gullá doaimmaheaddjilihtu ja Yleisradio gaskasaš bargoeaktosoahpamuššii.
”Sámeradio eadni”
Heaikka Káre lei sámeradio vuosttas nissondoaimmaheaddji. Jovnna Máret Jusse lohkáge, ahte son čuolai bálgá nuorat nissondoaimmaheaddjiide.
– Son lei vuosttas nissonolmmoš gii logai ođđasiid. Ja dat áigi 1960-lohku, eai lean sátnegirjjit ja galggai hutkat ođđa sániid. Máilbmihan álggii teknihkalaččat nuppástuvvat hui jođánit.
Jovnna Máret Jusse dadjá, ahte cuiggodeaddjit gal gávdnojedje, muhto Heaikka Káre ii das suorganan.
– Káre lei roahkkat. Go almmolaččat álgá lohkat ođđasiid, de oažžu ráhkkanit dasa, ahte kritihkage boahtá. Muhto ii dat Káre ballan, son barggai maid galggai bargat.
Heaikka Káre lei muhtinlágan ovdagovva nuorra sámi nissoniidda, jáhkká Jovnna Máret Jusse.
– Dán áigge sámeradios leat eanáš nissonolbmot barggus, ahte dienláhkai son lei ofelaš maiddái.
Go sámeradio doaibma viiddui, de álge boahtit ođđa ja nuorra bargit dállui. Heaikka Káre veahkehii sin álgui.
– Káre lei vehá dego eadni daidda. Son rávvii ja jeđđii go ledje vehá hástalusat. Son lei muhtinláhkai sámeradio eadni, dadjá Jovnna Máret Jusse.
Heaikka Káre bázii sámeradios ealáhahkii jagis 1998.
