Nevil Shute

Nevil Shute Norway blei fødd i Hampshire i England. Farens namn var Arthur Hamilton Norway, men Nevil tok forfattarnamnet Nevil Shute. Han studerte ved Balliol College på Universitetet i Oxford og ved tekniske skular i Shrewsbury og Woolwich. I 1922 blei han tilsett ved Havilland flyfabrikkar. Som flyingeniør var han med på å etablere flyprodusenten Airspeed.

Ved sida av arbeidet som flykonstruktør skreiv Shute romanar, som blei populære og gradvis gjorde han økonomisk velståande. Under den andre verdskrigen var Shute kapteinløytnant i den britiske marinen og fekk tildelt forskjellige spesialoppdrag. Etter krigen emigrerte han til Australia, der han heldt fram med å skrive romanar.

Shute debuterte med romanen Marazan i 1926, og han gav ut sin siste roman, En troskyldig mann, same året som han døydde (1960). Handlinga i den mest kjende boka hans, Den siste bredd (1957), skildrar korleis innbyggarane i Melbourne i Australia ventar på å døy som resultat av ein atomkrig. Denne romanen blei filmatisert i 1959 med Gregory Peck og Ava Gardner i hovudrollene.

Éin grunn til at Shute sine romanar blei uvanleg populære, er at dei framstår som relativt enkle. Psykologisk er dei likevel meir samansette enn ein slik karakteristikk kan tyde på. Fleire kritikarar har peika på at Shute konstruerte bøkene sine litt på same måten som han konstruerte fly – alle delane skulle henge saman og ha ein funksjon.

Shutes popularitet i Noreg blei forsterka ved at Den Norske Bokklubben i 1973 gav ut En by som Alice. Romanen framstiller opplevingane til den unge engelske kvinna Jean Paget etter at ho er tatt til fange av japanske soldatar i Malaysia under den andre verdskrigen.

Dei fleste av bøkene til Shute er omsette til norsk, og mange er filmatiserte.

Shute var påverka av forteljetradisjonen både i engelsk litteratur og i sin eigen familie. Han skriv underhaldande og spenningsskapande, men utan at handlinga verkar usannsynleg. Shute er ein uvanleg tilgjengeleg romanforfattar som har påverka mange skjønnlitterære forfattarar både i Storbritannia og internasjonalt. Sjølvbiografien Slide Rule kom i 1954.

• Pastoral (1944). Livet og leken. Omsett av Leif Toklum. Oslo: Aschehoug, 1946.
• The Chequer Board (1947). Sjakkbrettet. Omsett av Peter Magnus. Oslo: Forlaget for alle, 1969.
• No Highway (1948). Den som intet våger. Omsett av Anders Magnus. Oslo: Aschehoug, 1949.
• A Town Like Alice (1950). En by som Alice. Omsett av Anders Hagerup. Oslo: Aschehoug, 1950. Også omsett med same boktittel av Ragnhild Eikli. Oslo: Aschehoug, 2019.
• Round the Bend (1951). Der veien slutter. Omsett av Liv Malling. Oslo: Aschehoug, 1975.
• Requiem for a Wren (1955). Til minne om Janet. Omsett av Anders Hagerup. Oslo: Aschehoug, 1955.
• On the Beach (1957). Den siste bredd. Omsett av Hans Heiberg. Oslo: Aschehoug, 1958.
• Trustee from the Toolrom (1960). En troskyldig mann. Omsett av Anders Hagerup. Oslo: Aschehoug, 1960.

• Storbritannias litteratur
• roman

• Anderson, John (2011). Parallel Motion: A Biography of Nevil Shute Norway. Creskill, NJ: The Paper Tiger.
• Croft, Julian (2000). «Norway, Nevil Shute». Australian Dictionary of Biograhy, bind 15, s. 498–499. Melbourne: Melbourne University Press.
• Marcus, Laura og Peter Nichols (red. 2012). The Cambridge History of Twentieth-Century English Literature. Cambridge: Cambridge University Press.