O alfabeto persa (en persa: الفبای فارسی, romanizado: Alefbâye Fârsi) é un alfabeto escrito de dereita a esquerda empregado para representar a lingua persa. É unha variación do alfabeto árabe con catro letras adicionais: پ چ ژ گ. É a base de moitos sistemas de escrita empregados en Asia central e meridional. Úsase para representar as variedades estándar do persa, o iraniano e o dari; e é un dos dous sistemas de escrita oficiais da lingua persa, xunto co alfabeto taxico baseado no cirílico.
A escrita é principalmente, mais non exclusivamente, de dereita a esquerda; as expresións matemáticas, as datas numéricas e os números que levan unidades escríbense de esquerda a dereita. A letra é cursiva, o que significa que a maioría das letras dunha palabra conéctanse entre si; cando se escriben, os procesadores de textos contemporáneos unen automaticamente formas de letras adxacentes.
