Donbas

Den Donbas, Donbass of Donetsbassing (Oekraïens: Донбас Donbas; Russisch: Донбасс Donbass) is een historische, culturele en economische regio geleegn in 't ôostn van Oekraïne, te westn van Rusland en te nôordn van de Zêe van Azov. Den overgrôte mêerderheid van den Donbas wordt bezet deur Rusland vanwege de Russisch-Oekraïenschn oorlog, angezien dat de Russische strydkrachtn vanof oktober 2025 oungeveer 90% van de regio controleern. De regio omvat twêe oblastn (provinsjes): den oblast Donetsk en den oblast Loegansk.

Liggienge van den Donbas in Oekraïne

Koarte van de Donbasregio

't Woord Donbas is e soamnstellienge van "Donets" (zyriviere van de Don) en 't woord "bassing" (Russisch: бассейн).

Der zyn verschillige definiesjes van den omvang van de regio. In de moderne geopolitiek verwyst den Donbas mêestal noa d' oblastn Donetsk en Loegansk in Oekraïne. Somtyds wordt de noame Donbas ook gebruukt vo de regio die hem uutstrekt tout in de zuudwestelikn oblast Rostov van Rusland, ook de Russischn Donbass genoemd. D' historische koolmyneregio sloot dêeln van d' oblastn Donetsk en Loegansk uut, moar omvatte wel gebiedn in den oblast Dnepropetrovsk en Zuud-Rusland. D' Euregio Donbas bestoat uut d' oblastn Donetsk en Loegansk in Oekraïne en den oblast Rostov in Rusland.

In moarte 2014, achter de Russische annexoasje van de Krim en 't gevolg van de pro-Europeesche Euromaidan-protestbewegienge en de doaruut vôortvloeinde Revoluusje van de Weirdigheid, groeidn de pro-Russische protestn in den Donbas uut tout e gewoapnd conflict tusschn d' Oekraïensche krygsmacht en de deur Rusland gesteunde separatistn en antiregeriengsactivistn, met den Oorlog in Ôost-Oekraïne tout gevolg, ounderdêel van de Russisch-Oekraïenschn Oorlog. Grôte dêeln van den Donbas wierdn veroverd deur pro-Russische rebelln die doar ip 12 meie 2014 de zelfverkloarde volksrepubliekn Donetsk en Loegansk uutriepn, moa da wierd internationoal nie erkend.

Circa twêe derde van de regio blêef in handn van Oekraïne, en 't overige dêel kwam in handn van de separatistn. De machtsverdêlienge blêef gelyk, tout da Rusland ip 21 februoari 2022 de volksrepubliekn officieel erkende en drie doagn loater e grôotschoalige invoazje van Oekraïne begost.

Ofbeeldiengn die ier by passn ku je vien in de categorie Donbas van Wikimedia Commons.