Pokrov (lidn, Venäma)

Pokrov (ven.: Покро́в «kate» vai «kaičend») om Venäman lidn Vladimiran agjan päivlaskmas. Mülüb Petuškan rajonha lidnankundaks, sen kaikiš suremb lidn koumespäi.

Pokrov
Покров

Lidnanznam
Valdkund	Venäma
Eläjiden lugu (2021)	17,747 ristitud
Pind	19 km²
Pämez'	Oleg Kisläkov (reduku 2015—)
Telefonkod	+7−49 243-xx-xxx
Avtokod	33
Aigvö	UTC+3 (MSK+0)

Istorii

Eländpunkt mainitase ezmäižen kerdan vl 1506 kuti külä läz Antonii Pokrovskijan jumalankodid. Vozil 1678−79 se sai partiarhan Pokrovskoje-žilo-nimed. Pokrovskijan (Jumalanmaman Katken) jumalankodi oli olmas vhesai 1711, om tühjitadud. Vspäi 1778 kätihe žilod lidnaks nügüdläiženke nimenke i vahvištihe ezmäšt pertišton šingotesen planad.

Pokrovan ižandusen päsarakod oma sömtegimišt (järed šokoladfabrik i pränikoiden tehmine), biopreparatoiden i raudbetontegesiden pästand, mugažo juvelirine i elektromehanine tegimed ratas, omblendfabrik om saudud.

Geografijan andmused

Petuškan rajonan sijaduz agjas vn 2010 kartal

Lidn sijadase rajonan suvipäivlaskmas, penen Ščitkanjogen randal (ven.: Щитка / Шитка kahesa kilometrad pitte, lankteb Vol'ganjogehe) vides kilometras Kläz'man randaspäi, sen hural randpolel, 125 m ü.m.t. keskmäižel korktusel. Pokrov om ümbärtud penil järvil da pedaimecoil.

Matkad Petuškad-lidnhasai om kahesatoštkümne kilometrad päivnouzmha, Vladimirhasai — 81 km päivnouzmha. Lähembaižed järedad lidnad sijadasoiš Moskvan agjas: Jegor'jevsk kuz'kümnes kilometras suvhe orhal, Orehovo-Zujevo kaks'kümnes kilometras suvipäivlaskmha i Noginsk 45 km päivlaskmha orhal.

Tobmuz

Pokrov om lidnankundan üks'jäižeks eländpunktaks.

Lidnankundan pämez' om sen Deputatoiden nevondkundan ezimez'. Edeline lidnan pämez' om Andrei Mägkov, radoi edel vn 2015 redukud. Lidnan Administracijan pämez' om Denis Rogov vn 2022 tal'vkuspäi, tegi sen pämehen velgusidme mugažo vn 2018 elokus-tal'vkus. Edeline lidnan Administracijan pämez' om Oleg Kotrov (tal'vku 2018 — kül'mku 2022).

Eläjad

Vn 2010 Venäman rahvahanlugemižen mödhe lidnan eläjiden lugu oli 17,756 ristitud, vn 2021 — 17,747 ristitud. Kaik 17,308 eläjad oli lidnas vl 2017. Kaikiš suremb lidnan ristitišt oli 17..18 tuhad eläjid vozil 2010−2017 i vl 2021.

Ortodoksižen hristanuskondan Jumalanmaman Katken jumalanpert' om saudud lidnas 16. voz'sadaspäi (kivine vspäi 1672), sen ližaks om koume tošt jumalanpertid i časoun'. Eläban Eziauguižen Stroican päjumalanpert' om kaičenus vaiše paloin. Jumalanmaman Tulendan Pühäpertihe sar'hine naižjumalankodi om väges vspäi 1991 (mez'jumalankodi vll 1708−1919), sijadase lidnan lodehližel röunal.

Openduz

Lapsiden opendusen aluzkundad oma viž nomeruidud päivkodid (nomer 1..5), augotižškol, kaks' keskškolad (nomer 1 i 2), armotomiden lapsiden kodi, lapsiden da norišton sädamižen šingotesen keskuz, čomamahtoiden škol, kommertižetoi Risujem-artškol («Pirdam»), seičemen sportansugun sekcijad, lapsiden Junarmii-organizacijan kommertižetoi sodapatriotine Mirotvorec-palakund («Kožmusensädai»).

Socialiž-gumanitarine kolledž (Pokrov) om lidnan professionaližen opendusen aluzkundaks.

Transport

Federaline «Volg»-avtote (M7) läbitab lidnad. Avtobusstancii radab trassan teverel.

Pokrov-raudtestancii sijadase nelläs kilometras suvipäivnouzmha lidnan keskusespäi «Moskv — Vladimir»-raudtekeskustal.

Galerei

• 
  Pokrovan kodirandantedištandmuzei (2013)
• 
  Jumalanmaman Katken jumalanpert', vn 2009 nägu
• 
  Šokoladfejan muštpacaz vl 2011
• 
  Jumalanmaman Tulendan Pühäpertihe sar'hine naižjumalankodi, vn 2011 nägu
• 
  Pokrov-päraudtestancijan sauvuz vl 2010

Irdkosketused

• Municipaližen «Pokrov-lidn»-ühtnikan tobmuden aluzkundoiden oficialine sait (pokrovcity.ru). (ven.)