Este artigo trata sobre a República Federal de Alemaña de 1949–1990.Para o actual país que existe dende 1990 véxase: Alemaña.
A República Federal de Alemaña (abreviado RFA; en alemán: Bundesrepublik Deutschland, abreviado BRD), Alemaña Occidental ou Alemaña do Oeste, foi un estado de Europa entre 1949 e 1990, cando se produciu a reunificación desta coa República Democrática Alemá.
Constituída como república federal o 23 de maio de 1949, incluía as zonas de ocupación de Francia, Reino Unido e EUA, ademais da parte occidental de Berlín, divididas en diferentes estados creados segundo a historia dos antigos principados do Sacro Imperio Romano. O estado foi declarado totalmente soberano o 5 de maio de 1955, con capital en Bonn, pero as forzas de ocupación permaneceron para contrarrestar a influencia soviética na Alemaña do Leste.
Trala caída do muro de Berlín o 9 de novembro de 1989, acelerouse a unificación das dúas Alemañas, que formalmente constituíu unha anexión da RDA por parte da República Federal de Alemaña. A unificación tivo lugar o 3 de outubro de 1990, e a retirada das forzas de ocupación, o 15 de marzo de 1991.
