Listo de landnomoj
Landonomoj estas tradicia temo por disputoj en Esperantujo. La suba tabelo donas superrigardon pri la diversaj nomoj uzitaj kaj uzataj pri hodiaŭaj landoj.
La unua kolumno (sen titolo) donas la duliteran koderon laŭ ISO 3166.
La kolumno Monato sekvas la poŝkalendaron La Jaro 2009, eldonitan de Flandra Esperanto-Ligo, kun ellaso de parentezaj precizigoj. En la TTT-ejo de FEL troviĝas aktualigita versio de la sama listo. Monato dum multaj jaroj plejparte uzis la rekomendojn de la Akademio de Esperanto kun nur manpleno da esceptoj. En multaj el tiuj okazoj la novaj rekomendoj de la Akademio en 2009 kongruas kun la uzo en Monato.
La kolumno PIV sekvas paĝojn 1262-1264 de PIV2002 kun la korektoj el NPIV-Korektendoj.pdf (versio de 2004-12-06).
La kolumno UEA sekvas paĝojn 278-280 de Jarlibro 2009 de UEA.
La kolumno Akademio prezentas la rekomendojn de la Akademio de Esperanto de 2009.[1] Tiu kolumno enhavas multajn nomojn kiuj povas finiĝi per aŭ -ujo aŭ la neoficiala -io, ĉar la neoficiala -io samsignifas kun la Fundamento -ujo ĉe gentobazaj landnomoj. Do eblas Afganio anstataŭ Afganujo, k.s.
La kolumno Aliaj nomoj listigas aliajn nomojn uzitajn aŭ uzatajn sufiĉe vaste por meriti mencion.
En ĉiu kolumno la nomo uzata kiel artikoltitolo en la Esperanta Vikipedio havas ligilon al la artikolo pri la koncerna lando.