黃寶瑤（英文：Wong Po Yiu，1993年9月18號—），係香港女演員同歌手，《全民造星III》嘅參賽者，前女子組合「星座少女」成員，組合解散後繼續以個人身份發展。
黃寶瑤2016年加入由名模何紫綸創辦嘅女子組合「星座少女」（Staries），不過個組合未有突出表現就已經解散咗。2018年佢參加試鏡後被揀中做電影《我要做特務》嘅女主角，唱埋電影主題曲《習慣孤單》，不過套戲要到2021年6月先至成功上畫[1]。
黃寶瑤2020年亦有參加ViuTV選秀真人騷《全民造星III》，入圍初選83強，不過佢喺前哨戰未晉級之餘，佢嘅表演亦被成段刪剪咗而無緣喺電視播出。
