老花

老花（粵拼：lou5 faa1，英文：Presbyopia），係指眼睛出現老化，晶狀體唔可以將近物對焦而導致視力問題嘅情況，患者喺睇近嘢嘅時候會覺得模糊。

Presbyopia
分類同外部資源
ICD-10	H52.4
ICD-9	367.40

老花眼鏡

病徵

喺睇近嘢嘅時候患者會覺得模糊，而且光線唔夠嗰陣特別嚴重。噉係因為光線唔夠嘅時候人嘅曈孔會擴大，導致景深變窄。

另一個病徵係，大幅轉移視線焦點嗰陣，患者睇到嘅瞬間影像會暫時變得朦查查，噉係因為眼嘅變焦慢咗。

成因

隨住人嘅年紀增長，對眼睇近嘢嘅調節力會逐漸下降。目前醫學界重未能夠完全確定老花嘅成因，但一般認為主要嘅原因係：眼裡面晶狀體嘅彈性隨住年紀增長逐漸減弱，睇近嘢嗰陣，晶狀體弧度唔夠，未能將光線聚焦到視網膜；但亦有可能係晶體嘅弧度隨住年齡改變，又或者控制晶體弧度嘅睫狀肌隨住年紀增長冇咗力度。

另外，開始有老花嘅年齡可能同緯度、日照時間有關，住喺熱帶嘅人出現老花會比溫寒帶嘅早，住喺海邊嘅人有老花眼亦比內陸嘅早。

對策

老花可以透過老花眼鏡或者隱形眼鏡來矯正。有輕微老花嘅人，如果睇書嗰陣將書攞遠啲就睇到嘅話，噉唔一定要配鏡。但如果度數加深，睇書覺得辛苦嘅，就應該配返副眼鏡，避免對眼過度疲勞；但配老花鏡要記得對好焦距，唔係嘅話可能會傷眼。

另一方面，由於患者可能亦有近視，噉嘅話睇遠同睇近就需要兩副眼鏡。唔想咁麻煩嘅可以考慮配雙光（雙焦）眼鏡，呢種眼鏡嘅鏡片有兩忽，分別有唔同嘅焦距，可以對應唔同度數同睇嘢遠近；如果一時要睇近，一時要望遠嘅，重可以配多焦點眼鏡，但戴呢啲類型嘅眼鏡係需要一段時間去適應。因為呢類鏡片無明顯兩忽，焦距慢慢改變，所以又俗稱漸進鏡。

睇埋

• 遠視
• 近視
• 散光