Ruse

Ruse (bolg.: Русе [ˈrusɛ]) om lidn Bolgarijan pohjoižes. Se om valdkundan videnz' lidn da kund eläjiden lugun mödhe, om Rusen agjan administrativižeks keskuseks da palaks, valdkundan kaikiš znamasižemb port Dunain randal.

Ruse
Русе

Lidnanznam	Flag
Valdkund	Bolgarii
Eläjiden lugu (2022)	143,417 ristitud
Pind	127 km²
Pämez'	Penčo Milkov (kül'mku 2019—, Пенчо Милков)
Telefonkod	+359−82
Aigvö	tal'vel UTC+2, kezal UTC+3

Lidnan kart (2016)

Istorii

Eländpunktan aluz om pandud kut Rimalaižen imperijan Seksaginta Prista-varmitez i jogivaldmad Vespasian-imperatoran ohjandusen aigan (vozil 69−79 meiden erad). Lidnuz oli muretuz 4. voz'sadal. Bolgarijalaižed sauvoiba lidnust tošti 9.-10. voz'sadoil, lidn mainitase nügüdläiženke nimitusenke siš-žo aigaspäi. Vll 1388−1878 lidn oli Ottomanan imperijan palaks Ruščuk-nimenke (turk.: Rusçuk om turkan nimi tähäsai). Vll 1866−1867 imperijan ezmäine raudte ühtenzoiti Rused Varn-lidnanke. Ruse-nimituz om pörtud oficialižeks vl 1878.

Edel 1990-nziš vozišpäi nened sarakod oliba Rusen tegimištos: laivansauvomine, kaivuzmašiništon i maizanduzmašinoiden pästand, kivivoinhimine (void, sauvondmujud), sömtegimišt (vinan tehmine) i tekstiližed edheotandad (noskad, naižiden i mehiden sobad). Kaik sarakod oma kaičenus, elektronik i ladimensauvomine ližaduiba. Kaik 65 adivpertid om avaitud lidnas. Kaks'tazopindaine sild Dunain kal't 2,8 km pitte om saudud läz lidnad vll 1952−1954.

Geografijan andmused

Lidnan sijaduz agjas i valdkundas vn 2004 kartal

Lidn sijadase agjan i valdkundan pohjoižröunanno, Dunai-jogen oiktal randal, 45 m ü.m.t. keskmäižel korktusel.

Matkad Sofii-pälidnhasai om 300 km suvipäivlaskmha-päivlaskmha, Romanijan Buharest-pälidnhasai om 75 km pohjoižhe.

Tobmuz

Lidnankundan kart (2017)

Lidnan tobmuden pämez' om kmet. Edeline kmet om Plamen Stoilov (Пламен Стоилов, reduku 2011 — kül'mku 2019).

Eläjad

Vl 2010 lidnan eläjiden lugu oli 173 672 ristitud, agjan kaks' koumandest. Kaikiš suremb lidnan ristitišt oli 202 793 eläjad vl 1999.

Rahvahad (lidnan eläjad, enamba 0,4 % vl 2011, ozutadud rahvahudenke): bolgarijalaižed — 90,4 %, turkad — 7,5 %, čiganalaižed — 0,9 %, toižed rahvahad — 0,8 %, segoitadud augotižlibundanke — 0,5 %. Heiden ližaks 13 tuhad eläjid (8,7 %) ei ozutand ičeze rahvahut.

Galerei

• 
  Lidnankundan ohjastusen pert' (2009)
• 
  Pühän Stroican kafedraline päjumalanpert' (1632, ortodoksine hristanuskond), vn 2020 uhokun nägu
• 
  Päivnouzmaine tegimištoline zon, heinku 2011
• 
  Rusen universitetan keskuzkorpus vl 2013
• 
  Valdkundaline operteatr (vn 2020 elokun olend)
• 
  Ruse-päraudtestancii vn 2013 uhokus

Irdkosketused

• Lidnankundan ohjastusen oficialine sait (obshtinaruse.bg, vai ruse-bg.eu). (bolg.) (angl.)