BTS
BTS (in hangul, 방탄소년단, Bangtan Sonyeondan, «Pitzocos scout a proa de balla»), connotu fintzas comente Bangtan Boys, Beyond the Scene (sigla inglesa de BTS) o fintzas Bangtan isceti, est unu grupu musicale masculinu sudcoreanu fundadu in su 2013. Est cumpostu dae sete membros: Jin, Suga, J-Hope, RM, Jimin, V e Jungkook. Nàschidu dae su sistema de Idols de su K-pop cun una forte influèntzia hip-hop, su grupu at incorporadu cun su tempus una variedade manna de gèneres musicales in su repertòriu suo.
| BTS | |
|---|---|
.jpg) | |
| Informatziones | |
| Connotu fintzas comente | Bangtan Boys Bangtan Sonyeondan Beyond The Scene Bulletproof Boy Scouts |
| Giassu | ibighit |
BTS debutat su 13 de làmpadas de su 2013 suta sa cumpangia Big Hit Entertainment cun su sìngulu 2 Cool 4 Skool. Un'annu a pustis pùblicat un'album in istùdiu pro su mercadu coreanu, Dark & Wild e unu pro su mercadu giaponesu, Wake Up. S'album a pustis, Wings (2016), est su primu discu issoro chi bendet prus de unu millione de còpias in sa Corea de su Sud. In su 2017 intrat in su mercadu musicale mundiale comente a unu de is grupos printzipales de s'Unda Coreana, prus che totu in sos Istados Unidos.
Est su primu artista coreanu a retzire una tzertificatzione dae sa Recording Industry Association of America (RIAA) cun su sìngulu «MIC Drop», e fintzas su primu a arribare in sa prima positzione de sa classìfica Billboard 200 cun s'album Love Yourself: Tear (2018). In su 2020 essit unu de sos pagos grupos capassos a tènnere bator albums nùmeru unu in sos Istados Unidos in prus pagu de duos annos, unu risultadu chi peruna banda aiat otentu a pustis de sos Beatles intre su 1966 e su 1968.
In su matessi annu, sa regorta Love Yourself: Answer (2018) essit su primu discu in limba coreana a otènnere sa tzertificatzione de plàtinu dae sa RIAA. In prus, BTS est istadu su primu grupu coreanu a balangiare su primu logu in su matessi tempus in sa Billboard Global 200 e sa Billboard Hot 100 cun su sìngulu Dynamite, nominadu fintzas a unu Grammy Award. Cun sos sìngulos chi sighint, Savage Love, Life Goes On, Butter e Permission to Dance, est su primu grupu coreanu chi arribat a tènnere chimbe nùmeros unu in sos Istados Unidos dae su tempus de Justin Timberlake in su 2006.
A su 2026, BTS est su grupu artìsticu cun is bèndidas prus artas in s'istòria de sa Corea de su Sud segundu Circle Chart, cun prus de 40 milliones de discos bèndidos in su paisu e prus de 142,1 milliones in totu su mundu. S'album Map of the Soul: 7 est su discu prus bèndidu in Corea de su Sud e su primu a superare sos bator e sos chimbe milliones de còpias bèndidas. Est fintzas su primu artista de limba non inglesa a fàghere unu cuntzertu cun totu sos billetes bèndidos in s'Istàdiu de Wembley (Love Yourself World Tour, 2019).
At retzidu reconnoschimentos medas, comente vàrios American Music Awards, Billboard Music Awards, Golden Disc Awards e chimbe nòminas a sos Grammy Awards. In prus, sa Federatzione Internatzionale de s'Industria Fonogràfica (IFPI) ddu nòminat Artista Mundiale de s'Annu in su 2020 e in su 2021.
Sos membros ant partetzipadu in prus ocasiones a s'Assemblea Generale de sas Natziones Unidas e ant creadu sa campagna contra sa violèntzia Love Myself, in collaboratzione cun UNICEF, in su 2017. Sa revista Time los incluit in sa cobertedda de s'editzione internatzionale comente Lìderes de sa generatzione noa e lis narat Prìntzipes de su Pop. Figurant fintzas intre sas 25 persones prus influentes in Internet (2017–2019) e intre sas 100 persones prus influentes de su mundu (2019). In su 2018 essint sos prus destinatàrios giòvanos de s'Òrdine de su Mèritu Culturale, cuntzessu dae su Presidente de sa Corea de su Sud pro s'agiudu issoro a ispainare sa cultura e sa limba coreana in su mundu.