Абориджини

Абориджини (старобивателє) то заєднїцка назва за племена старобивательох Австралиї. Корень назви зоз латинского язику ab origine цо значи од початку (пребуванє на єдним месце од давна). Абориджини ше волали и єден митолоґийни, найстарши и праисторийни народ Апенинского полуострова. Познєйше назва интернационализована и означує старобивательох даєдней жеми або континенту. Нєшка то звичайна назва за старобивательох Австралиї хтори населюю тот континент найменєй 30 000 роки. ^[1]

Науковци твердза же ше Абориджини населєли до Австралиї ище у лядовим периодзе. Теди вельки острова Нова Ґвинея и Борнео були векши, а морски преход медзи тима островами и Австралию вельо узши. Дума ше же предки нєшкайших старобивательох Австралиї пришли зоз тих подручох.^[2] Нєшкайши Папуанци и Меланезийци маю тиж чарнєйшу фарбу скори, алє ше уж на перши попатрунок розликую од Абориджинох, а тиж так и култура при тих народох иншака. Коло 50 000 австралийски державянє (0,25 проценти вкупного числа жительства) бешедю на даєдним мацеринским абориджинским язику, а найвецей ше бешедує на заходнопустиньским (7 400) и аренте язику(5 500).

Дружтвена орґанизация

Старобивателє Австралиї подзелєни на вецей стотки племена, бешедовали на коло 600 язикох. Дакеди Абориджинох було вельо вецей як нєшка, велї нєстали або ше асимиловали до сучасного австалийского дружтва. Кажде племе бешедовало на власним язику, а було и диялекти. Старобивателє були орґанизовани до малих бандох або фамелийних ґрупох.

Кажда ґрупа мала вожда, звичайно старшого искуснєйшого хлопа, хтори одлучує дзе и кеди ше ма поставиц табор, кеди ше руша на драгу и у хторим напряме. Вожд добре позна територию, дзе єст води, дзе и кеди мож ловиц и пренайсц поживу. Младеж виложена иницияцийом (участвую у традицийних ритуалних чинох пред уходом до пубертету) хтори нєшка нє потримую влаци Австралиї.

Обичаї

Абориджини ловя и збераю поживу. Копия и бумеранґ їх основне оружує. Старобивателє коло побрежя збераю мегучкарки, водово коритка и раки, у пустиньских предїлох ловя животинї и птици. Тото цо уловене дзелї ше шицким членом ґрупи. Поживу ше готови на отвореним огню. Збера ше и рошлїни и нашенє хторе Абориджини знали зомлєц и до муки.

У даєдних таборох було од 6 до 10 особи, а дакеди и до 50, а було их коло 400.^[1] Колїби (gunyah) правени зоз древа и пруца. Велькосц табору условена зоз количеством поживи хтору ше намагали обезпечиц шицки члени ґрупи, и то кажди дзень. Коробори то ритуални танєц Абориджинох, а танцую го лєм хлопи. Инструменти хтори хасную то диджериду, палїчки и черкотки. Жительство вери до реинкарнациї, односно же ше по шмерци чловекова душа враца на жем у форми животинї.

Интересантносци

После гавариї ладї Стефано 1875. року, при побрежю сиверозаходней Австралиї настали приятельства медзи Горватами и Абориджинами. Здогадованя горватских морякох и обвисценє тедишнєй явносци як прежили тото нєщесце, занавше пременєли упечаток о Абориджинох хтори по теди колониялней явносци були представени як народ нїзшей класи. Двоме млади Горвати, моряки хтори прежили, описали тот народ як приємни, шмели и чесни народ, у поровнаню з тедишнїм колониялним приказу у хторим старобивателє описани як расисти.^[3]

Року 1967. Австралиянци гласали же би ше союзних предписаньох притримовали и Абориджини, понеже векшина нє мала право гласа по 1965. рок.

Нєшка лєм три проценти жительства Австралиї ма абориджински предки, и далєй ше боря за свойо права, же би затримали културу и обичаї и же би були признати як ровноправни народ.

Власци у варошу Викториї ше намагаю подписац спорозуменє зоз Абориджинами на основи хторого би ше их признало и оможлївело им одвитуюци бенефициї. Медзитим, спорозуменє нїґда нє подписане, так же Австралия єдина держава у Британским комонвелту хтора нє подписала нїяке спорозуменє зоз своїма старобивателями.

Литература

Aboriginal culture one of Earth's oldest, Australian Geographic, 23.09.2011., Pristupljeno 21.08.2026.
Australian Indigenous tools and technology, australia.gov.au. 20. 4. 2016., Pristupljeno 21.08.2026.
Aborigion Culture, Rock art, Bush foods and Stories, in National Park Uluru - Kata Tjuta, Pristupljeno 21.08.2026.

Почитац:

- Национални парк Улуру - Ката Т′юта

Вонкашнї вязи

Абориџини, wikisource.org

Кратка историја Аборидџина, magazin.politika.rs

Референци

↑ ^1,0 ^1,1 Aborigine – Definition, Merriam-Webster Dictionary. 31. 8. 2012.
↑ Bowler, James M; Johnston, H; Olley, J M; Prescott, John R; Roberts, Richard G; Shawcross, Wilfred; Spooner, Nigel A (20. 2. 2003). „New ages for human occupation and climatic change at Lake Mungo, Australia”. Nature. 421 (6925): 837—840. Bibcode:2003Natur.421..837B.PMID 12594511. S2CID 4365526. doi:10.1038/nature01383.
↑ Мишић, Милан, ур. (2005). Енциклопедија Британика. А-Б. Београд: Народна књига : Политика. стр. 82. ISBN 86-331-2075-5.

[:0-1] 1,0 ^1,1 Aborigine – Definition, Merriam-Webster Dictionary. 31. 8. 2012.

[2] Bowler, James M; Johnston, H; Olley, J M; Prescott, John R; Roberts, Richard G; Shawcross, Wilfred; Spooner, Nigel A (20. 2. 2003). „New ages for human occupation and climatic change at Lake Mungo, Australia”. Nature. 421 (6925): 837—840. Bibcode:2003Natur.421..837B.PMID 12594511. S2CID 4365526. doi:10.1038/nature01383.

[3] Мишић, Милан, ур. (2005). Енциклопедија Британика. А-Б. Београд: Народна књига : Политика. стр. 82. ISBN 86-331-2075-5.

[1]