Picuda
Picuda (Sphyraena barracuda) ta un especie di pisca grandi cu ta pertenece na e famia Sphyraenidae (baracuda). E naturista Britanico George Edwards a describi e especie pa prome biaha na 1771.
| Picuda | ||
|---|---|---|
| Status di IUCN: No menasa[1] | ||
 | ||
Picuda cu prooi | ||
| Clasificacion taxonomico | ||
| Especie | ||
| S. barracuda (Edwards, 1771) | ||
| Sinonimo | ||
Sphyraena picuda Bloch & Schneider, 1801 Sphyraena becuna Lacepède, 1803
Sphyraena commersonii Cuvier, 1829 Sphyraena dussumieri Valenciennes, 1831 Sphyraena agam Rüppell, 1838 | ||
Picuda | ||
Imagen riba  Wikimedia Commons | ||
Picuda riba  Wikispecies | ||
| WoRMS | ||
| [Edita Wikidata] · [Manual] |
Distribucion y habitat
editáE especie ta un pisca di awa salo y di awa brak, presente rond di costanan di Ocean Pacifico, Atlantico y Indio, particularmente den e region west di Atlantico y Lama Caribe. E ta prefera awanan (sub)tropikal di poco profundidad, especialmente rifnan di coral, cu un profundidad maximo te 100 meter. El a wordo registra den awanan rond di e islanan di Caribe Hulandes, incluso den Sababank.[2]
Descripcion
editáPicuda generalmente ta midi rond 1.4 meter, pero por yega te dos meter y un peso di 50 kilogram. Su curpa ta largo y smal, manera un torpedo, di color plata cu strepinan preto. E bariga ta blanco cla, mientras cu e parti ariba ta mas scur. E tin un snuit punta; e cachete abou ta mas largo cu esun ariba y ta yena cu djentenan skerpi.[3] Riba lomba tin dos hala y ademas tin un hala anal.
Alimentacion
editáE especie ta un predado cu ta warda su prooi yega cerca (ambush predator) pa ataca cu gran velocidad. E ta come principalmente pisca mas chikito y macroinvertebre, cu e ta localisa cu su wowonan skerpi. E ta prefera pisca cu ta biba den grupo, pasobra e ta facilita e captura di algun. Durante e fase larval (yiuchi), e ta cuminsa come kopepodo y despues ta pasa pa larva di pisca.[4]
Relacion cu hende
editáPicuda tin importancia limita pa pesca comercial den regionnan unda su carni ta considera menos atractivo. Sinembargo, e ta wordo pisca regularmente den awanan di Caribe, unda e ta bon conoci pa e piscado, specialmente pa via di e consumo local di su carni blanco den sop'i pisca.[3]
Den pesca deportivo y recreativo picuda ta masha popular, pasobra e ta resistí fuerte ora e wordo pega. Metodonan di captura ta inclui "trolling" for di boto, tiramento for di costa cu liña of bara, "jigging" y uzo di lansa. Ademas, e especie ta wordo exhibi den algun acuario publico.
Aunke hende no ta prooi natural di picuda, den naturalesa por tin incidentenan di mordi, generalmente den situacion di mal visibilidad of ora un landado a yega hopi cerca di e pisca.
Bibliografia
editá- Lieske, E., R. Myers: Coral Reef Fishes: Carribbean, Indian Ocean, Pacific Ocean, Including Red Sea. Princeton, New Jersey: Princeton University Press. Aña 1999.
- Blaber, S.: Fish and Fisheries of Tropical Estuaries. New York: Chapman and Hall. 1997.
Link externo
editá- Great Barracuda, IUCN Red List
- Sphyraena barracuda riba FishBase
Fuente, nota i/òf referensia
|