Faustina Frank
E articulo aki ta uza ortografia di Papiamento. Lo aprecia si por mantene e articulo aki na estilo di Papiamento.Faustina Maria (Tina) Frank (☆ 15 di februari 1940 na Noord - † 7 di september 2026 na Aruba)[1] tabata un educador y politico Arubano. Entre 1976 y 1979, e tabata minister di Enseñansa di Antias Hulandes den gabinete Evertsz y despues den gabinete Rozendal. E tabata e prome hende muhe Arubano pa ocupa un puesto ministerial den Antias Hulandes. Frank tabata tambe defensor di derechonan di hende muhe, y a boga pa mas participacion di hende muhe den bida social y politico.
| Faustina Frank | ||
|---|---|---|
| Imagen desea: Faustina Frank | ||
| Informacion basico | ||
| Nomber completo | Faustina Maria Frank | |
| Nacemento | 15 di februari 1940 Aruba | |
| Fayecimento | 7 di september 2026 | |
| Informacion profecional | ||
| Partido | PPA (1973-1979) PPN (1988-1993) | |
| Ofishi | educador, politico | |
| Funcion | ||
| 1975-1976 | miembro di Conseho Insular di Aruba | |
| 1976-1979 | Minister di Enseñansa di Antias Hulandes | |
| [Edita Wikidata] · [Manual] | ||
Biografia
editáFaustina Frank a nace y lanta na Noord. Despues di a completa Mulo na Maria College na Oranjestad na 1956, el a bay Hulanda pa sigui studia pa maestro di scol na Reuver (Limburg).[2][3] Despues el a pasa un aña mas di estudio na Amsterdam pa obtene su hoofdakte.
Na 1961, Frank a cuminsa su carera den enseñansa na Aruba. El a duna les na diferente scol, entre otro Fatima College, Mater Dei Huishoudschool, Filomena Mavo, y Maria College Mavo.[4] Despues di a avansa den e sistema di enseñansa na Aruba, el a bira inspector di enseñansa.[5]
Den su trabou como educador, Frank tabata boga pa un sistema di enseñansa den cua e cultura di e alumnonan tabata refleha den e materialnan escolar.[5]
Politica
editáFaustina Frank a bira activo den politica na 1973 como candidata riba lista di Partido Patriotico Arubano (PPA). Na 1975, el a wordo eligi como miembro di Conseho Insular di Aruba. Hunto cu Grace Bareño (MEP), e tabata un di e prome muhenan cu a bira miembro di Conseho Insular, predeci solamente pa Maria Irausquin-Wajcberg (PPA) na 1963.[6] Na 1973, Frank e ta wordo eligi como miembro di directiva di PPA y na 1977 el a bira vicepresidente di e partido.[7][8]
Frank tabata tambe un di e voznan mas fuerte pa derecho di hende muhe riba e isla. El a boga pa pone fin na discriminacion contra hende muhe, specialmente discriminacion di muhe casa na trabou. Su actividad politico tabata inclui campañanan pa duna hende muhe mas participacion y un bos den sociedad.[9][10]
Na fin di 1975, Parlamento di Antias Hulandes a pasa un mocion di desconfiansa contra tres minister di MEP den gabinete Evertsz, despues di cua nan a retira.[11] Como sucesor di Hendrik Croes, Frank a wordo nombra minister di Enseñansa na maart 1976. Cu esaki, el a bira e prome hende muhe Arubano pa asumi un puesto ministerial den gobierno di Antias Hulandes.[5]
Na eleccion 1977 pa Parlamento di Antias Hulandes Frank a ricibi 727 voto personal como candidata nr.3.[12] For di 14 di october 1977 te 30 di juli 1979 el a sirbi como Minister di Enseñansa bou di gabinete di Boy Rozendal.[13] Despues di su periodo ministerial, el a retira for di politica activo.[14]
Na 1988, Frank ta haci un re-entrada den politica.[14] El a postula su mes den e eleccionnan pa Parlamento di Aruba na 1989 y 1993 como candidata riba lista di Partido Patriotico Nobo (PPN). El a ricibi respectivamente 34 y 15 voto personal.[15][16]
Otro actividad
editáDen añanan 1960, Frank tabata activo den diferente organisacion. E tabata miembro di directiva di Wit-Gele Kruis, Sociedad Bolivariana, Arubaanse Muziekschool i e sindicato di enseñansa catolico St. Thomas.[17][18] Ademas, e tabata activo den Mascaruba i a participa den diferente actividad teatral.[19]
Faustina Frank a fayece na Aruba dia 7 di september 2026, na edad di 86 aña.
Fuente, nota i/òf referensia
|