मिमी (२०२१ चलच्चित्र)

मिमी बरिस २०२१ मे जारी भेल हिन्दीभाषाके भारतीय हास्य-नाटक चलच्चित्र हे । एकरा लक्ष्मण उटेकर द्वारा निर्देशित आउ दिनेश विजान द्वारा निर्माण कैल गेल हे । एकरामे कृति सेनन मुख्य भूमिकामे हथ जे एक विदेशी जोड़ाला सरोगेट माय बनेला मान जा हे । पङ्कज त्रिपाठी, साई ताम्हनकर, मनोज पाहवा, सुप्रिया पाठक सहायक भूमिकामे लौकहैथ । एवलिन एडवर्ड्स आउ एडन व्हाईटॉक विदेशी जोड़ाके रूपमे हथ । एकरा २६ जुलाई २०२१ मे नेटफ्लिक्स आउ जियो सिनेमा पर जारी कैल गेल हल ।

मिमी
निर्देशक	लक्ष्मण उटेकर
लेखक	लक्ष्मण उटेकर रोहन शङ्कर
आधारित	समृद्धि पोरे द्वारा माला आई व्हायची!
निर्माता	दिनेश विजान जियो स्टूडियो
अभिनेता	कृति सेनन पङ्कज त्रिपाठी साई ताम्हनकर
छायाकार	आकाश अग्रवाल
सम्पादक	मनीष प्रधान
सङ्गीतकार	ए आर रहमान
निर्माण कम्पनी	मैडडॉक फिल्म्स जियो स्टूडियो
बितरक	जियो सिनेमा नेटफ्लिक्स
प्रदर्शनतिथिसभ	26 जुलाई (2021-07-26)
लम्बाई	133 मिनट
देस	भारत
भाषा	हिन्दी

मिमीके घोषणा अगस्त २०१९ मे कैल गेल हल आउ अक्टूबर २०१९ मे राजस्थान आउ मुम्बईमे एकर फिल्माङ्कन भेल । फिल्मके सङ्गीत ए आर रहमान द्वारा रचित हे जखनिकि गीत अमिताभ भट्टाचार्य द्वारा लिखल गेल हे । छायाङ्कन आउ सम्पादन क्रमशः आकाश अग्रवाल आउ मनीष प्रधान द्वारा सम्भारल गेल हे । ई २०११ के मराठी फिल्म मला आई व्हायचय! के रीमेक हे ।

कहानी सारांश

जॉन आउ समर अमेरिकी दम्पति हथ जिनका गर्भधारण नै होवैत हे । ऊ सरोगेट मायके तलाशमे राजस्थान जा हथ । स्थानीय नृत्याङ्गना आउ महत्वाकांक्षी अभिनेत्री मिमी राठौड़ (कृति सेनन) उनका आदर्श सरोगेट माय लग हे । ऊ स्थानीय टैक्सी ड्राइवर भानु प्रताप पाण्डे (पङ्कज त्रिपाठी) के ₹२० लाख (US$२५,०००) के वादाके साथे मिमीके मनावेला कहलन । मिमी जे बॉलीवुडमे हीरोइन बनेके चाहत रखहे, शुरुआती हिचकिचाहटके बाद सहमत हो जा हे । फिर मिमी जॉन आउ समरके लैकाके साथे गर्भवती हो जा हे । अपन माता-पितासे गर्भावस्थाके लुकावेला मिमी उनकासे झूठ बोलहे कि ऊ एक फिल्मके शूटिङ्गला ९ महीनाला मुम्बई जाइत हे । ऊ अपन दोस्त शमाके साथे रहे लगहे ।

७ महीना बाद

नियमित जाँचमे पता चलहे कि मिमीके अजन्मल लैकाके डाउन सिण्ड्रोम हे जेकरासे जॉन आउ समर भौँचक्का हो जा हथ । ऊ कहहथ कि ऊ अखनि लैका नै चाहहथ आउ एकचके अमेरिका चल जा हथ । ऊ मिमीके गर्भपात करावेके सुझाव दे हथ । निराश होके ऊ लैकाके जन्म देवेके निर्णय करहे । मिमी घर लौटहे आउ झूठ बोलहे कि लैका भानुके हे । जेकरासे आउ अधिक समस्या पैदा हो जा हे काहेकि भानुके पत्नी दिल्लीमे रहहे ।

मिमी एक स्वस्थ लड़का राजके जन्म दे हे । जेकरासे ओकरा पता चलहे कि पहिलेके जाँचके परिणाम गलत हल । लैकाके गोर त्वचाके कारण लोगमे उत्सुकता आउ हैरानी पैदा होवहे । जेकरासे ऊ स्थानीय रूपसे प्रसिद्ध हो जा हे । जखनि भानुके परिवार राजस्थानमे आ हे त भ्रम आउ अराजकता फैल जा हे । अन्ततः मिमी सरोगेसीके बारेमे सबके बता दे हे आउ ओकर परिवार लैकाके स्वीकार कर ले हे । ऊ राजसे गहराईसे जुड़ जा हे आउ ओकर देखभालला अपन बॉलीवुड आकांक्षाके छोड़ दे हे ।

४ बरिस बाद

राज अखनि बड़ हो गेल हे । जेकरा मिमीके माता-पिता बड़ी पसन्द करहथ । फेसबुक पर मिमी आउ राजके एक वीडियो देखेके बाद जॉन आउ समर भारत लौट आवहथ । उनका कहलाम हे कि ऊ अपन मन बदल लेलन हे आउ राजके बापिस अमेरिका ले जाएल चाहहथ । मिमी राजके बापिस देवेसे मना कर दे हे । हालाँकि जॉन बैधानिक कार्रवाई कैलक धमकी दे हे काहेकि मिमी एगो अनुबन्ध पर हस्ताक्षर कैलक हल । भानु आउ मिमीके माता-पिता न्यायालयमे लड़ेके तैयारी करहथ किन्तु मिमी राजके जॉन आउ समरके बापिस देवेके निर्णय करहे ।

जॉन आउ समरके अमेरिका जाएके दिन; मिमी, भानु आउ ओकर परिवार राजके विदा करेला आवहे । ई पता चलहे कि मिमीके घरसे बापिस आवैत खनि ऊ एगो अनाथालयमे गेलन हल । उनका अनाथालयके दोहारी पर रोवैत लैकी पसन्द आवहे आउ ऊ ओकरा गोद ले ले हथ । समर बतावहे कि मिमीके राजके साथ देखेके बाद उनका लगलै कि माता-पिता बनेला खूनके रिश्ता जरूरी नै हे । ऊ राजके मिमी आउ उनखर परिवारके साथे छोड़ दे हथ ।

मुख्य कलाकार

• कृति सेनन — मिमी राठौड़ / चान्द (नकली)
• पङ्कज त्रिपाठी — भानु प्रताप पाण्डे / नसीरुद्दीन (नकली)
• साई ताम्हनकर — शमा
• मनोज पाहवा — मान सिंह राठौड़
• सुप्रिया पाठक — शोभा राठौड़
• जया भट्टाचार्य — मिमीके डॉक्टर डॉ आशा देसाई

नामाङ्कन आउ पुरस्कार

वर्ष	नामित कार्य	पुरस्कार	परिणाम
२०२२	कृति सेनन	फिल्मफेयर सर्वश्रेष्ठ अभिनेत्री पुरस्कार	जीत
	पङ्कज त्रिपाठी	फिल्मफेयर सर्वश्रेष्ठ सहायक अभिनेता पुरस्कार	जीत
	साई ताम्हनकर	फिल्मफेयर सर्वश्रेष्ठ सहायक अभिनेत्री पुरस्कार	जीत
	ए आर रहमान	फिल्मफेयर सर्वश्रेष्ठ सङ्गीत निर्देशक पुरस्कार	नामित
	श्रेया घोषाल ("परम सुन्दरी")	फिल्मफेयर सर्वश्रेष्ठ पार्श्व गायिका पुरस्कार	नामित

बाहरी कड़ी

• इण्टरनेट मूवी डेटाबेस पर मिमी