Akademi

Akademi (bhâsa Yunani: Ἀκαδημία) panèka sakola'an sè èpaddhek sareng Plato è Athena ra-kèra taon 387 SM. Aristoteles ajhâr è Akademi dupolo taon (367-347 SM) sabellunna maddhek sakola'anna dhibi', Likeon. Akademi pagghun èterrossaghi è bhâkto Helenistis mènangka sakola'an Skeptisisme kantos lobâr saamponna Filon orèng Larisa sèdhâ è taon 83 SM. Maskè para filsuf terros ngajhâri filsafat Plato è Athena è jhâman penjajahan Romawi, Akademi bhuru èpaddhek polè è taon 410 M mènangka pusat Neoplatonisme, bân pagghun aktif kantos ètotop sareng Kaisar Yustinianus Agung è taon 529 M.

Sabellunna dhâddhi perguruan, bahkan sabellunna è paghâri bân tembok sareng Kimon, Akademi panèka hutan suci è lowar tembok kottah Athena kuno, è dimma ka'-bhungka'an zaitun suci Athena, dewi hikmat, tombu. Nyama aslina, Hekademea (Ἑκαδήμεια), aoba dhâddhi Akademia è jaman Klasik. Nyama panèka èhubungaghi sareng Akademos, pahlawan legendaris Athena, molaè awal abad ke-6 SM.

Akademi dhâddhi kennengngan suci sè èkhususaghi ghâbây dewi Athena bân tokoh-tokoh abadi laènna, kennengngan upacara pemujaannah ampon èlaksanaaghi molaè Zaman Perunggu, yakni upacara pemujaan sè kamungkinan èhubungaghi ka Dioskuroi, yakni dewa-pahlawan kembar Kastor bân Poludeukes, polana situs panèka èhubungaghi sareng Akdemos, sè ampon èjhârbâ'aghi lokasi è dimma Helene èsèmpen. Bâkto nyerrang Atika, pasukan Sparta nyalamettaghi "Hutan Akademe" polana hormat dâ' kasocceyanna sè kona bân hubunganna dâ' ibada ka Dioskuroi. Sula, komandhan Romawi, ta' nojjhuaghi pangakowan sè akadhi jârèya; è taon 86 SM, èpon motong ka'-bhungka'an zaitun suci Athena kaangghuy è padhâddhi kaju ramuan pesawat-pesawat kepung kaangghuy usahanah arebbhu' kottah Athena.