Maia Sandu

Maia Grigorevna Sandu (mold. Maia Sandu; 1972-jıl 24-may, Risipen awılı, Moldaviya SSR, SSSR) — Moldaviya siyasiy hám mámleketlik ǵayratkeri. 2020-jıl 24-dekabrden baslap Moldaviya Respublikası Prezidenti. Moldaviyanıń 2020-jıl 23-oktyabrde saylanǵan prezidenti.

Moldaviyanıń 2019-jıl 8-iyunnan 12-noyabrge shekemgi aralıqtaǵı premer-ministri.

2016 hám 2020-jıllardaǵı saylawlarda Moldaviya prezidentligine kandidat.

Ómirbayanı

Ol 1972-jıl 24-mayda Moldaviya SSR Faleshti rayonı Risipen awılında Grigoriy hám Emiliya Sandulardıń shańaraǵında dúnyaǵa kelgen.

1989 — 1994-jılları Moldaviya ekonomika bilimlendiriw akademiyasınıń basqarıw fakultetinde oqıǵan. 1995-jıldan 1998-jılǵa shekem Moldaviya Prezidenti janındaǵı Mámleketlik basqarıw akademiyasınıń magistraturasında xalıqaralıq qatnasıqlardı úyrengen. 2010-jılı AQSh-tıń Kembridjdegi Garvard Djon Kennedi atındaǵı Mámleketlik basqarıw institutın tamamlaǵan.

Rumın, rus, ingliz hám ispan tillerin jetik biledi.

Turmısqa shıqpaǵan, balaları joq. Ol Kishinevte maydanı 74 m² bolǵan eki xanalı kvartirada jasaydı. Sonday-aq 2007-jılǵı Toyota RAV4 avtomobilin basqaradı.

Kásiplik xızmeti

Maia Sandu 1994-jıl 1-iyuldan baslap Moldaviya Ekonomika ministrligi Sırtqı ekonomikalıq baylanıslar departamentiniń Evropa Awqamı hám Qara teńiz basseyni mámleketleri menen birge islesiw bóliminiń bas qánigesi xızmetin atqardı, al 1996-jıl iyun ayında Xalıqaralıq ekonomikalıq shólkemler menen birge islesiw boyınsha bas basqarmanıń máslahatshisi boldı.

1997 — 1998-jılları ol Xalıqaralıq ekonomikalıq shólkemler menen birge islesiw boyınsha bas direktordıń orınbasarı wazıypasın atqarıwshı boldı.

1998 — 1999-jılları — máslahatshi, 1999 — 2005-jılları — Kishinevtegi Dúnnyajúzlik banktiń mekemesinde ekonomist.

2005 — 2006-jılları Moldaviya Ekonomika ministrliginde Makroekonomikalıq siyasat hám rawajlanıw baǵdarlamalarınıń bas basqarmasınıń direktorı, 2007-jıldıń mart — sentyabr aylarında BMSh-nıń Moldaviyadaǵı Rawajlanıw baǵdarlaması sheńberindegi baǵdarlamalardıń koordinatorı, 2007 — 2009-jılları oraylıq mámleketlik basqarıwdı reformalaw boyınsha másláhatshi boldı.

2010 — 2012-jılları Vashingtondaǵı Dúnyajúzlik banktiń atqarıwshı direktorınıń másláhatshisi.