George North
Cyn-chwaraewr rygbi'r undeb o Gymru yw George North (ganwyd 13 Ebrill 1992). Chwaraeodd dros Gymru gan ennill 121 o gapiau, a sgorio 47 cais. Bu'n chwarae i glybiau y Sgarlets, y Gweilch, Northampton Saints a Provence.
| George North | |
|---|---|
 | |
| Ganwyd | 13 Ebrill 1992  King's Lynn |
| Dinasyddiaeth |  Cymru |
| Alma mater | |
| Galwedigaeth | chwaraewr rygbi'r undeb |
| Taldra | 193 centimetr |
| Pwysau | 109 cilogram |
| Chwaraeon | |
| Tîm/au | Tîm rygbi'r undeb cenedlaethol Cymru, Y Scarlets, Seintiau Northampton, Y Llewod Prydeinig a Gwyddelig, Wales national under-18 rugby union team, Y Gweilch, Provence Rugby |
| Safle | Asgellwr, Canolwr |
| Gwlad chwaraeon | Cymru |
Yn 2026, ef oedd llywydd Dydd Sadwrn yn Eisteddfod Genedlaethol yr Urdd, Ynys Môn.[1]
Bywyd cynnar
golyguGaned George Philip North yn King's Lynn, Norfolk, Lloegr. Symudodd y teulu i Ynys Môn pan oedd George yn ddwy flwydd oed ac o ganlyniad mae yn siaradwr Cymraeg rhugl. Cafodd ei addysgu yn Ysgol Uwchradd Bodedern ac yng Ngholeg Llanymddyfri. Partner George yw'r seiclwraig Becky James, ac mae ganddynt dau fab, Jac a Tomi.
Gyrfa glwb
golyguYn 2009, cynrychiolodd Gymru dan ddeunaw, gan chwarae fel canolwr. Cafodd ei alw i fod yn sgwad ddatblygu'r Sgarlets yn yr haf yn 2010, gan chwarae yng ngêm agoriadol 2010/11 Cynghrair Magners yn erbyn Benetton Treviso. Hyd at ei alw i'r tîm cenedlaethol, roedd wedi chwarae chwe gêm i dîm cyntaf y Sgarlets.
Ar ôl chwarae i'r Sgarlets o 2010-13 cadarnahwyd ar 9 Medi 2013 y byddai'n symud at dîm y Northampton Saints ar gytundeb o dair blynedd.[2] Yn 2018 symudodd i chwarae gyda'r Gweilch. Symudodd i glwb Provence yn 2024.[3]
Ymddeolodd o rygbi proffesiynol ar ddiwedd tymor 2026.[4] Chwaraeodd ei gêm olaf ar 27 Mehefin 2027 mewn gêm rhwng Cymru a'r Barbariaid yn Stadiwm Allianz. Roedd North yn chwarae i'r Barbariaid a chafodd dau gais, er enillodd Cymru o 33 pwynt i 31.[5]
Gyrfa ryngwladol
golyguWedi dechreuad addawol i dymor 2010, cafodd ei ddewis yn Hydref 2010 i sgwad o 33 ar gyfer cyfres ryngwladol yr Hydref. Enwyd ef ar 11 Tachwedd i chwarae dros Gymru yn erbyn De Affrica ar 13 Tachwedd, gan ei wneud y 3ydd chwaraewr ifancaf i gynrychioli Cymru ar ôl Tom Prydie a Norman Biggs ac yn gyfartal ag Evan Williams.
Gwnaeth George argraff ddofn yn ei gêm ryngwladol gyntaf ar ddydd Sadwrn 13 Tachwedd 2010 yn erbyn pencampwyr cyfredol y byd wrth sgorio dwy gais i Gymru yn Stadiwm y Mileniwm.
Enillodd ei ganfed cap dros ei wlad ar 27 Chwefror 2021 pan enillodd Cymru y Goron Driphlyg gyda buddugoliaeth o 40-24 yn erbyn Lloegr.[6] Ymddeolodd o rygbi rhyngwladol ar ddiwedd Pencampwriaeth y Chwe Gwlad yn 2024, a symudodd i glwb Provence yn Ffrainc.[3]
Cyfeiriadau
golygu- ↑ "Y diweddaraf ar ddiwrnod cyntaf Eisteddfod yr Urdd Ynys Môn". BBC Cymru Fyw. Cyrchwyd 23 Mai 2026.
- ↑ "BBC Sport - George North: Northampton sign Scarlets and Wales wing". Bbc.co.uk. 2013-04-09. Cyrchwyd 2013-04-30.
- 1 2 "George North i ymddeol o rygbi proffesiynol ar ddiwedd y tymor". BBC Cymru Fyw. 2026-04-29. Cyrchwyd 2026-04-29.
- ↑ "George North i ymddeol o rygbi proffesiynol ar ddiwedd y tymor". BBC Cymru Fyw. 2026-04-29. Cyrchwyd 2026-06-27.
- ↑ "Cais i George North yn ei gêm olaf a thimau Cymru'n curo'r Barbariaid". BBC Cymru Fyw. 2026-06-27. Cyrchwyd 2026-06-27.
- ↑ Cymru’n dathlu’r Goron Driphlyg , Golwg360, 27 Chwefror 2021.
Dolenni allanol
golygu- (Cymraeg) Proffil North ar wefan y Sgarlets Archifwyd 2012-06-09 yn y Peiriant Wayback
- (Saesneg) "Scarlets wing George North makes Warren Gatland's Autumn squad" gan newyddion Walesonline