Milvus milvus

*Milvus milvus*
Milana u milano (Milvus milvus)
Denominacions populars
milana, milano, milaneta, esparvero reyal, esparvero abadeixero, pollero
Estau de conservación
Seguro (IUCN)
Clasificación cientifica
Dominio:	Eukaryota
Reino:	Animalia
Filo:	Chordata
Clase:	Aves
Orden:	Accipitriformes
Familia:	Accipitridae
Subfamilia:	Milvinae
Chenero:	Milvus
Especie:	M. milvus
Descripción
Milvus milvus Linnaeus, 1758
Distribución cheografica
Distribución de M. milvus en Eurasia. Narancha = En verano. Verde = Tot l'anyo. Azul = Hibierno

A milana^[1] u milano^[1] (nombre cientifico Milvus milvus (L., 1758)) ye un au rapinyadera d'a familia Accipitridae, subfamilia Milvinae. Ye, a mas, por a suya mida a especie mas chicota d'ista subfamilia en Eurasia, mas que no a suya parient o esparvero negro. En Aragón tamién conoix altros nombres populars. En Espanya encara ye prou común de trobar-lo, pero en a resta d'Europa ista especie se troba en firme regresión.

As suyas midas varían d'entre os 62 y os 71 cm de lonchitut, pero como toz as especies de Milvinae ye un animal esencialment planiador que tiene unas alas luengas y estreitas, as cuals cuan se desplegan obren dica 190 cm d'amplaria.

Tiene as plumas royencas por a tripa y as partes baixas d'o cuerpo, con a cabeza mas grisenca que a resta. Dos mallas blancas concabidas en o negro de debaixo d'as alas, en chunto con a suya caracteristica coda bifurcada, la fan inconfundible cuan se la vei volar.

Nombres populars

En Aragón, os terminos mas frecuents ta referir-se-ie dimanan d'o latín milānus, que coinciden con as formas equivalents en altras luengas romances: "milana" y "milano" son as prencipals. Tamién se documenta a forma milaneta^[2], que talment fa referencia a la suya mida mas chiqueta que en altras especies semellants.

A demás, como totas as especies de Milvinae, tamién se troban formas relacionadas con o potencial arabismo lexico "alforocho", anque leixos d'estar as chenerals, no se i documentan si que en a comarca d'a Chacetania: "alforocho" en Aragüés de lo Puerto y Chaca^[2], y con mas frequencia "alforrocho" que se documenta en Ansó, Echo, Embún, Aragüés, Xabierregai y Puent d'A Reina en a dita comarca^[2], y en un punto nomás, que ye Santolaria de Galligo, en a vecina Plana de Uesca^[2].

Cualques autors han dau en os suyos estudios que tamién ye frecuent o termino "abadejo" (AFI /abadexo/), como López Pardo^[3] u Adolfo Aragüés Sancho, anque enquestas posteriors (R. Vidaller) muestran como se ixa parola no se i aplicase si que en a localidat d'Uncastiello^[2] (as Cinco Villas), aplicando-se en realidat en cuasi tot Aragón tradicionalment a lo peix Gadus morhua. Sí que tiene mas repercusión en territorio aragonés a parola pareixida "abadejero" (AFI /abadexeɾo/) que se documenta en Santolaria de Galligo^[2] (Plana de Uesca), en Borrés^[2] (Alto Galligo) y en Luesia^[2] (Cinco Villas). Pareix que toz istes casos acotan a distribución d'ixes terminos en o sector occidental d'o domenio lingüistico aragonés. Atamas de tot ixo, Inacio Arizón y Francho Rodés citan, en 1996, un caso de pronunciación aragonesa d'ixe termino que por demás siempre ha estau documentable con pronunciación castellana: "abadeixero" (AFI /abadeʃeɾo/) anque no ofreixen a procedencia cheografica d'ixa forma.^[4] Un atra denominación ye pollero^[1].

Y ya en zagueras, cal destacar que como totas as aus de presa de mida meyana, recibe tamién en muitos puestos d'Aragón o nombre inespecifico d'esparver/o, que ye mas especifico ta altras especies que se i pareixen anque no son filocheneticament relacionadas con os milanos (se veiga Buteo), asinas se troban os nombres esparvero reyal^[1] y esparvero abadeixero^[1].